THIS EDITORIAL IS FROM MET DEBAT OF RADIO HAITI INTERNATIONAL AND RADIO UPTIMUM

Bonswa tout moun,
Ayiti dabò, yon emisyon ki pase sou anten radyo optimum chak maten soti 10 zé rive midi kote nou debat tout gwo pwoblèm peyi a mete ansanm ak HaitiList.com yon sit entenet ki bay posiblite a chak grenn ayisyen kèlkeswa kote ou ye nan mond lan pou ou ka antre an kontak ak ansyen zanmi ou, fé nouvo zanmi e an menm tan diskite ak konpatriyot ou sou pi bon solisyon pou retire ayiti kotel ye jodia gen privilèj ak oné pou prezante nou dokté Guy Deve Theodore.

Doktè Theodore se yon ayisyen natif natal ki fét nan kòmansman lane 40 yo, nan yon lokalite ke yo rele piyon nan zòn plato santral ki sitiye a 40 kilomèt de Okap aysyen. Papa li deve Theodore ak manman li silvi Theodore te pran tout dispozisyon pou montrel chimen legliz yon fason poul ka renmen moun e poul ka trete tout moun ak respè e diyite.

Doktè Guy Theodore fè klas primèl nan “grande rivière du nord” paske piyon a sèt epòk pat gen lekòl, se nan “grande riviere” ke tout lòt sel ak frel apran li ak ekri,misye fè etid segondè li lise toussaint nan potoprens kote li toujou distengel nan mitan tout lòt elèv yo,pwofesè yo te toujou sispèk ke misye tap yon bagay nan vil kanmenm.
San parenn ,san mannigèt, nan kòmansman ane swasant yo misye rantre nan fakilte medsin kotel diplome san pwoblem, nan lane 70 yo li antre ozetazini poul vin kontinye etid li,kèk tan aprè li rantre nan lame meriken kotel li distingel kòm youn nan pi gwo chirijyen kap opere solda ki estwopye sou chan batay. Kòm misye te intelijan anpil, e kòm lite gen anpil disiplin, li pran grad yo byen vit jiskaskel rive kolonel, lèl rive poul jeneral ,yo mandel poul chanje nasyonalitel paske selon prensip lame ya fòk ou ameriken pou vin jeneral, kolonel Guy demisyone li pito tounen lakay li pou lal kontinye rev li, pou li al kenbe pwomess li te fè. Yon rèv kel te gen depi lel gen 12 zan pandan kel tap asiste lanmo pi bon zanmi li nan lokalite ya paske pat gen doktè, ki pi red pat gen menm yon sant de sante.

Sou bitasyon papal li kanpe lopital “ Faisance de pignon”, moso pa moso nan retire chen voye sou chat lopital sa a vin yonn nan pi gwo lopital ke peyi dayiti te janm genyen .Lopital sa a gen yon sal operasyon byen ekipe li menm gen satelit kote jenn etidyan nan medsin ozetazini kon chita pou pran bèt nan men doktè kolonel Guy Theodore, menm lòt gwo doktè lè yo kole nan operasyon yo pa wè ni devan ni dèye yo konn itilize menm system satelit la pou doktè Theodore dekole yo.

Lopital “Bien Faisance de piyon” akouche fanm ansent,yo vaksinen ti moun pou ka redwi kantite ti moun kap mouri chak ane,yo travay seryezman nan prevansyon sida ak nan ede moun ki deja atrape maladi ya,yo ankouraje moun yo fè planin yon fason pou ka diminye mizé nan tout zòn lan, dòk la kwè nan prensip ki di “prevenir vaut mieux que guerir” la se sak fè li mete anpil aksan sou medsin prevantiv avek 65 kaban e 4 klinik ki gaye tribo ba bo, moun soti toupatou nan peyi a vin ranmase bon jan swen nan lopital la.

Lopital la telman pwòp,li telman byen jere, an 1997 “The christian dental society” chwazil pou yo fè premye modèl pwogram laboratwa yo a se sak fè jounen jodya tout moun piyon ka al rache dan, korije jansiv, netoye dan ,mete nenpòt kalite fò dan lide yo di yo san okenn pwoblem, ti moun lekòl kapab vin tcheke dan yo chak ane menm jan sa fèt nan tout gwo peyi.

Doktè Guy se yon vizyonè misye se yon bon jan pwogresis, sètadi likwè nan yon devlopman integre se sak fè a pa lopital la li akonpanye popilasyon an nan domèn agrikilti paske si yon moun pa byen manje lap gen malnitrisyon, li voye kòl nan dlo potab paske si timoun pa brè dlo pwòp yap gen maladi dyare, li travese nan edikasyon kote li sèmante ke tout ti moun ki fèt nan zòn lan pral pral lekòl mensi paran yo pa ta gen mwayen. Li di tou zafè pou ti moun piyon ap tavèse grande Riviere du nord pou al resevwa moso lenstriksyon fòk sa kaba li ede konstwi 7 lekòl kote preske 2000 ti moun ap ranmase bon jan fòmasyon.

Li pa kanpe, li pouse imajinasyonl pi lwen toujou kotel li di pa ka gen devlopman san kominikasyon li fè wout nan piyon pou danre pa ret pouri nan men peyzan ,li pa satisfè toujou, li kanpe yon ayewopò kote avyon ateri piyon de fwa pa semenn sa vle di li konekte piyon ak tout rès peyi a e ak le mond antye anfen, anfen. Depi lè doktè Theodore alias pentle retounen piyon lavi moun nan zòn nan ak lòt lokalite ki antourel yo chanje net.

Se pou rezon sa a 14 oktòb ki sot pase la “Board of Surgeon” youn nan pi gwo òganizasyon medikal a travè le mond te bay doktè Guy Theodore yon “humanitarian Award” se premye fwa bòd la bay yon manb li distenksyon sa e se premye fwa bòd la onore yon ayisyen frè nou.

Ayiti dabord ansanm ak Haitilist.com melanje vwa yo ak tout lòt ayisyen konsekan pou di ou
• Mèsi doktè kolonel Guy Theodore,
• Mèsi paske ou pwouve ke tout ayisyen pa vòle,
• Mèsi paske ou travèse wanga konplo,tripotaj ,petitès pou fè onè nou,
• Mèsi paske ou pwouve ke nou ka pratike la syans an ayiti,
• Mèsi paske anfen ou pwouve ke yon ayisyen an ayiti ka jere yon lopital kòm sa dwa,
• Mèsi doktè Theodore ou retire wont la nan je nou,
• Mèsi doktè Theodore paske ou montre ke peyi sa pa pèdi,
• Mèsi doktè Theodore paske ou montre ke tout pitit ayiti fè yon sèl, ke pa gen yon gwoup ki se ayisyen lakol e yon lòt se dyaspora, ou montre avèk fyète ke tout ayisyen se Ayisyen, eke tout Ayisyen ki gen volonte kapab e dwe Ayiti soti nan katyobounde ke li ye la.
• Mèsi doktè Theodore paske ou rebannou lespwa pou nou kwè ke Ayiti ka rebondi e lika retounen yon kote nou tout kapab fyè pou nou rele lakay.

Pou nou fini nap di, ke peyi a bezwen plizye nèg tankou doktè Guy,nou bezwen 90 Guy Theodore nan chanm depite a, nou bezwen trant Guy Theodore nan sena a, nou ta renmen chak ministè yo gen yon Guy Theodore kap dirije yo tankou lopital piyon, chak depatman, chak seksyon kominal gen yon majistra tankou Doktè Guy Theodore a la bèl kapital la tap bèl, ala bèl Okap, Okay, Gonayiv, SenMak, Gonayiv, Jakmèl, Fò Libète, Jeremi, Pòdpè e latrye tap bèl, tap pwop tankou lopital « Bienfaisance de Pignon » , anfen nou ta renmen gen yon Guy Theodore nan palè Nasyonal kòm yon chèf òchès kap ede akòde mizik developman peyi e kap ede nou miltiplye tout lòt ti Doktè Guy Theodore nap chache yo. E tankou granmoun lontan te toujou di nou si tèt pwason an pouri tout kò ap pouri.

Yon lòt fwa anko mèsi anpil pentle.

To be added to the narration on the video: